مەراسیمی یادی ٢٩ هەمین تاوانی ئەنفال بەڕێوەچوو

کەلار – لە مەزاری ئەنفالکراوان لە گەرمیان، مەراسیمی بەرزڕاگرتنی ٢٩ هەمین ساڵیادی تاوانی ئەنفال بێڕێوەچوو.


کاتژمێر ٩:٣٠ بەیانی ئەمڕۆ، لە مەزازی ئەنفالکراوان لە گوندی دێبنەی سەر بە شارەدێی ڕزگاری سەر بە شارۆچکەی کەلاری ناوەندی ئیدارەی گەرمیان،  بە ئامادەبوونی وەزیری شەهیدان و ئەنفالکراوانی حکومەتی هەرێم و وەزیری کۆچ و کۆچبەرانی عێراق و ژمارەیەک لە پەڕلەمانتارانی هەردوو پەڕلەمانی هەرێم و عێراق و ژمارەیەکی بەرچاو لە بەرپرسانی حکومی و حزبی کەسوکاری ئەنفالکراوان، مەراسیمی بەرزڕاگرتنی ٢٩ هەمین ساڵیادی تاوانی ئەنفال بێڕێوەچوو

دەستپێکی مەراسیمەکە بە خولەکێک وەستان بۆ ڕێزگرتن لە خوێنی شەهیدان دەستپێکرد، پاشان وتاری کەسوکاری ئەنفالکراوان  لەلایەن ئەکرەم ساڵح خوێندرایەوە، تیایدا هاتبوو:” ئەوەیئێمەی توڕە و نیگەران کردووە ئەوەیە، نە حکومەتی عێراق میکانیزمێکی ڕوون و ئاشکرای هەیە، بۆ جێبەجی کردنی بڕیارەکانی دادگای باڵای تاوانەکانی عێراق، نە حکومەتی هەرێم”.

هەروەها، وتاری بەخێرهاتن لەلایەن سەلاح کوێخا سەرپەرشتیاری ئیدارەی گەرمیان پێشکەشکرا و تیایدا ناوبراو وتی:”ئەمڕۆ ٢٩ ساڵ تێدەپەڕێت بەسەر تاوانی ئەنفال، تاوانێک کە هیچی کەمتر نییە لەو تاوانە گەورانەی کە لە مێژ ژوودا دەرهەق بە مرۆڤایەتی کراوە، ئەم تاوانە ئامانج لێی قڕکردن و لەناوبردنی گەلێکی ئاشتیخواز بوو”.

هەر لە مەراسیمەکەدا، مەحمود حاجی ساڵح وەزیری شەهیدان و ئەنفالکراوانی حکومەتی هەرێمی کوردستان وتارێکی پێشکەشکرد و وتی:”ئەنفال تاوانێکە بۆ هەمیشە لە ویژدانی گەلەکەمان و مرۆڤایەتیدا بە زیندووی دەمێنێتەوە، حکومەتی هەرێمی کوردستان و وەزارەتمان، هەمیشە خزمەتکردنی کەسوکاری شەهیدان و ئەنفالکراوان و جینۆسایدی هەمیشە بە ئەرکی خۆی زانیوە، بەردەوام هەوڵی باشکردنی ژیان و گوزەرانی داون”.

لە درێژەم مەراسیمەکەدا، چەندین چالاکی هونەری و شانۆی و سۆز پێشکەشکران، لەکۆتای مەراسیمەکەشدا تاجەگوڵینە لەسەر مۆنۆمێنتی ئەنفال دانرا.