ژنانی گەنجی تێکۆشەر: ساکینە و هەڤاڵانی دەکەین بە پێشەنگی خۆمان

 

سلێمانی – ژنانی گەنجی تێکۆشەر لە ساڵیادی تیرۆرکردنی سێ ژنە سیاسەتمەداری کورد ساکینە جانسزو هەڤاڵانی، بەیاننامەیەکیان بڵاوکردەوەو ڕایانگەیاند:” بۆ تۆڵە سەندنەوەی ئەو کۆمەڵکوژییە تێکۆشانمان بەهێزدەکەین و ژنانی وەکو شەهید ساکینەو هاوڕێیانی دەکەینە پێشەنگی خۆمان.

ئەمڕۆ، ڕێکخراوی ژنانی گەنجی تێکۆشەر لە زانکۆی سلێمانی، لە ساڵیادی تیرۆرکردنی سێ ژنە سیاسەتمەداری کورد بەیاننامەیەکیان بڵاو کردەوە.

ژینۆ کەریم، ئەندامی دەستەی بەڕێوەبەری ژنانی گەنجی تێکۆشەر، لە کۆنگرەیەکی ڕۆژنامەوانیدا بەیاننامەیەکی خوێندەوە کە تێیدا هاتبوو: ژنانی گەنجی تێکۆشەر لە ساڵیادیدا تیرۆرکردنی سێ ژنە سیاسەتمەداری کورد شەهید ساکینە جانسز و هەڤاڵانی بە دەستی دوژمنانی کورد شەرمەزار دەکەین، کە چوار ساڵ بەر لە ئێستا و لە بەرواری ٩/١/٢٠١٣دا لە پاریس پایتەختی فەڕەنسادا سێ ژنی کورد کە ژیانی خۆیان بۆ ئازادی ژن و کوردستان و مرۆڤایەتی تەرخانکردبوو لە نێو وڵاتانی بەناو دیموکراسیدا بە بەرچاوی جیهان تیرۆرکران.

ئەوەش هاتبوو: هەر بۆیە لەم ڕۆژەدا ژنان لە کوردستان و لە هەموو جیهاندا دەڕژێنە سەر شەقامەکان بۆ شەرمەزارکردنی ئەو تاوانە، چونکە ویستیان لە کەسایەتی ئەواندا تەواوی ژنان تیرۆربکەن، بە تایبەت شەهید ساکینە، دەیانخواست پێشەنگی ژنی کورد و ڕۆحی ژنی تێکۆشەر لەناوبەرن و هەروەها لە شەخسی  شەهید لەیلا ویستیان ڕۆڵی ژنی گەنج لەناو ببەن”.

لە کۆتایی بەیاننامەکەدا ژنانی گەنج ڕایانگەیاند: ئێمە وەکو ژنانی گەنج بۆ تۆڵە سەندنەوەی ئەو کۆمەڵکوژییە تێکۆشانی خۆمان بەهێزدەکەین و ژنانی وەکو شەهید ساکینەو هاوڕێیانی و تەواوی ژنانی ئازادیخواز دەکەین بە پێشەنگی خۆمان.

سێ ژنە شۆڕشگێڕی کورد، ساکینە جانسز، یەک لە دامەزرێنەرانی پەکەکە، فیدان دۆغان، ئەندامی کۆنگرەی نەتەوەیی کورد لە فەرەنسا و لەیلا شایلەمەز، لە ٩-١-٢٠١٣ لە پاریسی پایتەختی فەڕەنسا تیرۆرکران.