ڕێکخراوێکی ژنان سەبارەت بە دۆخی ژنان هۆشیار دەدات

ناوەندی هەواڵ – ڕێکخراوى ژنانى گه‌نجى تێکۆشه‌ر له‌ به‌یاننامه‌یه‌کدا بانگەوازی لە ڕای گشتی دەکات بەرامبەر کۆمەڵکوژیەکانی ژنان خاوەن هەڵوێست بن.
له‌ به‌یاننامه‌یه‌کدا ڕێکخراوی ژنانى گه‌نجى تێکۆشه‌ر ئاماژه‌ بۆ زیادبوونى توندوتیژى دژ به‌ ژنان ده‌کات.
ژنانى گه‌نجى تێکۆشه‌ر لە لێدوانەکەدا ڕایگه‌یاندوە: له‌ ڕابردووه‌وه‌ تا ئێستا له‌ باشوری کوردستاندا جێ و پێگه‌ی ژن له‌ هیچ بوارێکی کۆمه‌ڵایه‌تی، سیاسی، ئابوری، ژیانی و هه‌موو بواره‌کای تردا نییه‌، له‌گه‌ڵ ئه‌مه‌شدا ڕووبه‌ڕوی هه‌موو جۆره‌ توندوتیژی جه‌سته‌ی و ده‌روونی ده‌بێته‌وه‌ یاخود ناچاری خۆکوشتن و خۆسوتاندن ده‌کرێته‌وه‌.
ڕاشیگه‌یاند: دواتر وه‌ک ڕووداوێک پاساوی بۆ ده‌هێنرێته‌وه‌ و وه‌ک بڵێی هیچ نه‌بووه‌ و ڕووی نه‌داوه‌، خودی ئه‌و ژنه‌ خۆی به‌ تاوانبار به‌ناو ده‌کرێت و له‌لایه‌ن یاساشه‌وه‌ به‌هه‌مان شێوه‌ مامه‌ڵه‌ی له‌گه‌ڵ ده‌کرێت و له‌به‌ر نه‌بوونی یاسایه‌کی جێبه‌جێکراو له‌بواری تاوانی ژن کوشتندا، که‌ نامرۆڤانه‌ترین تاوانه‌ و هێشتاش تاوانباران به‌ سه‌ربه‌ستی ژیانی خۆیان به‌سه‌ر ده‌به‌ن.
باسى له‌وه‌ش کردوه‌: ئه‌وه‌ی که‌ ئه‌مه‌ ده‌کات زهنیه‌تی کۆنه‌په‌رست و دواکه‌وتوی کۆیلایه‌تییه‌ و له‌به‌رامبه‌ر ئه‌مه‌ تێکۆشین نه‌کردن سه‌رچاوه‌ی ئه‌م تاوانانه‌یه‌، له‌م دوایانه‌ ژماره‌یه‌کی زۆر له‌ ژنان و کچان دووچاری کوشتن و ده‌ستدرێژی بوونه‌وه‌ و پێویسته‌ ڕای گشتی له‌به‌رامبه‌ر ئه‌م وه‌حشیه‌ته‌ بێده‌نگ نه‌مێنێت، به‌تایبه‌ت ژنان پێویسته‌ خاوه‌ن هه‌ڵوێست بن و به‌ هه‌ڵوێستی خۆیان یاسا ناچاری سزادانی تاوانباران بکه‌نه‌وه‌ .
له‌ کۆتایى به‌یاننامه‌که‌دا ژنانى گه‌نجى تێکۆشه‌ر ڕایگه‌یاندوه‌: “هه‌ربۆیه‌ ئێمه‌ وه‌کو ڕێکخراوی ژنانی گه‌نجی تێکۆشه‌ر به‌ڵێن ده‌ده‌ین، که‌ به‌ تێکۆشینی خۆمان و به‌ وشیارکردنه‌وه‌ی ژنان و به‌ره‌و ئازادی په‌لکێشکردنیان، تۆڵه‌ی گیانی گه‌نجی سه‌روینه‌کان، ناز و سنوره‌کان و هه‌موو ئه‌و کچ و ژنانه‌ی، که‌ بوون به‌ قوربانی ئه‌قڵیه‌تی پیاوسالاری و ده‌سه‌ڵاتی پیاوسالار بستێنینه‌وه‌ و ژیان و کۆمه‌ڵگایه‌کی ئازادیان بۆ بکه‌ین به‌ دیاری، هه‌روه‌ها تێکۆشان بکه‌ین بۆ بونیادنانی په‌روه‌رده‌یه‌کی ڕاست و ناساندنی مێژووی ڕاسته‌قینه‌ی ژن”.